Fomba Fankalazana ny 25 Desambra
Fampihaingoana miavaka ny tranon'Andriamanitra
Mety hisy hilaza hoe. tsy azo atao izany ny mampihaingo ny tranon'Andriamanitra? Inona moa no fahotana amin'izany, sady vao mainka tsara no tokony hatao isan'andro aza? Tsy vitsy ny fiangonana no mampihaingo ny tranon'Andriamanitra amin'ny vanim-potoana miavaka.
Marina izany, tokony ho ravahana tokoa ny tranon' Andriamanitra ary tsy misy maharatsy izany. Saingy hafa noho ny fandravahana ataon'ny fiangonana amin'ny fety hafa ao am-piangonana ny 25 desambra, na samy miravaka aza dia tsy mitovy ny fisehony fa manatombo kokoa ny 25 desambra. Misy tandindon'ny 25 desambran'ny masoandro sy Mithra foana ao anatiny, izay tsy hay hazavaina fa zary tonga ho azy.
Ohatra, tsy mbola misy mihitsy fiangonana mankalaza krismasy na noely ka tsy handravaka ny trano fiangonana; fa na inona na inona atao eo dia tsy misy lanjany ny krismasy raha tsy eo ny firavaka. Izany hoe: ny firavaka ao ampiangonana no manome lanja ny krismasy ka aleo ny Tenin'Andriamanitra aza no tsy mifandraika amin'ny nahaterahan'i Jesosy toy izay ny ravaka ao ampiangonana no tsy misy. Fahafinaretan'ny maso no misongadina amin'ny 25 desambra izay lova ratsy napetraky ny fanompoan-tsampy masoandro sy Mithra.
Porofo iray izany fa fanompoan-tsampy vaovao tandindon'ny 25 desambra tranainy ity 25 desambra vaovaon'ny fiangonana ity, ary tsy mety miala mihitsy. Andramo anie ny manala ny firavaka ao am-piangonana hoan'izay mankalaza ny 25 desambra raha tsy foana ho azy io krismasy na noely io na dia mitory sy manambara ny nahaterahan'ny Mpamonjy aza izy.
Ny sakafobe sy ny fitafiana miavaka
Mbola hitranga koa ny fanontaniana: - Ratsy izany ny misakafo sa tokony hifady hanina (Jeûne) rehefa 25 desambra?- Tsy mety koa izany ny miakanjo tsara sy mendrika rehefa 25 desambra?
Fanontaniana mifamahofaho daholo izany. Tsy hoe ratsy na tsy azo atao akory izany, fa ny tandinom-pahatsiarovana navelan'ny 25 desambra mihitsy no tsy mety. Izao no fomba taloha raha hitodika ny lasa isika:
Ny "mithraïsme" dia nijanona ho fivavahan' ny antokon'olona mikambana ho vondrona iray, izany hoe, be dia be ny antoko, ary saiky isan-tanàna mihitsy dia ahitana izany . "Mithraea" no anaran'ny toerana ivavahana amin'i Mithra, tsy tempoly goavana sy tsara tarehy izy io fa toerana tsotsotra ihany. Miara-misakafo eo ny olona sady mandray ny fanahin'ny tsi-fahafatesana . Amin'ny fombam-pivavahana dia mamono vototr'ombilahy eo izy ireo sady mihinana izany mba hahatonga fifandraisana matotra amin'ny andriamanitra masoandro".
Fetin'ny andriamanitra masoandro sy Mithra
Marihina fa tsy sakafo tsotra fotsiny, fa tafiditra ao ny zava-pisotro isan-karazany, hatramin'ny mahadomelina, ny dihy izay fanaon'izao tontolo izao fa tsy fomban'ny kristiana. Misy mihitsy aza miteny fa raha tsy tonga lafatra ny sakafo, dia tahaka ny tsy manao krismasy. Azo lazaina izany fa feti-kanina ny krismasy hoan'ny sasany. Diniho tsara ny fibosesiky ny akoho amam-borona mandritra ny volana desambra, hatramin'ny toerana tsy ampoizina hivarotana azy ireny dia ahitana izany avokoa. Satria nahoana? Tonga ny krismasy ka iza no tsy hihinana.
Nandritry ny fankalazana ny fetin'ny masoandro sy Mithra dia zava-dehibe ny fanomanana ny fitafiana ho amin'izany:
- Tsy maintsy manao akanjo vaovao sy lafo vidy; manomana izany efa volana vitsivitsy mialoha;
- Amin'ny misasak'alina dia niboridana avokoa na vavy na lahy; fa ny ampitso 25 desambra kosa dia mianjaika sy mampidera bika eran'ny tanàna.
- Mandritra ny fankalazana dia tonga amin'ny fitenenana hoe "borizano mipataloha, ka samy mihinjitra amin'izay ananany".
Tandindon'izany no mbola misy ankehitriny raha mankalaza ny noely ny olona; volana septambra dia efa misy vonona sahady izay akanjo ho entina krismasy, ary rehefa andro vitsivitsy mialohan'ny higadonan'ny fety dia mifanitsa-kitro ny mpiantsena ary ny voalohany amin'izany dia ny haingo sy ny sakafo. Ny mampihomehy dia misy mahavatra mindrana akanjo amin'ny namany raha sendra sanatria tsy mahita vola hividianana mihitsy, ary inona no anton'izany?
Satria menatra raha tsy manao fitafiana vaovao ho hitan'ny olona. Ary vao mainka koa fahagagana ny mahita ny tokantrano sasany mindrana na manofa gisa herinandro mialoha mba hihiaka ao an-trano hahafantaran'ny manodidina fa gisa ny laoka amin'ny krismasy, ka rehefa vita ny fety dia aterina moraramora any amin'ny tompony ny gisa; ary amin'ny andro alina no anaterana izany sao misy mahatsikaritra. Tena mahazendana!